سيو متجر سلة يتوزع على أربع أماكن في لوحة التحكم: إعدادات السيو العامة للمتجر، وحقول السيو داخل كل منتج، وحقول كل قسم، والنص البديل لكل صورة. إذا مرّيت على هذي الأماكن بالترتيب اللي تحت، تكون غطيت الأساس اللي يحتاجه قوقل عشان يفهم متجرك ويعرضه للناس الصح.
هذي القائمة مكتوبة عشان تفتح لوحة سلة جنبها وتمشي عليها بند بند. ما تحتاج خبرة تقنية، تحتاج بس تعرف وش يكتب عميلك في قوقل لما يدور منتجك.
أول شي: إعدادات السيو العامة للمتجر
من لوحة التحكم ادخل على التسويق ثم تحسين محركات البحث (SEO). هنا تلقى عنوان ووصف الصفحة الرئيسية، وقوالب العناوين للمنتجات، وخريطة الموقع، وملف llms.txt.
- عنوان المتجر: اكتب نشاطك بكلمة يبحث عنها الناس، مثل «عطور عود ودهن عود أصلي» بدل اسم المتجر لحاله. انتبه إن سلة تضيف هذا العنوان في آخر عنوان كل صفحة، فخله قصير.
- وصف المتجر: جملتين تقول وش تبيع ولمين وش يميزك. الحقل يقبل 160 حرف كحد أقصى، ويرفض الفاصلة العربية والنقطة والشرطة وعلامة @، فإذا ضغطت حفظ وما صار شي، شيك على هالعلامات.
- قالب عنوان المنتجات: لو منتجاتك كثيرة، القالب يكتب عنوان السيو تلقائي من اسم المنتج والقسم. راجع شكله على منتج واحد قبل ما تعتمده، لأن أي خطأ فيه ينطبق على كل المنتجات.
- خريطة الموقع: سلة تسويها لحالها. خذ رابطها وأرسله في سيرش كونسول.
إذا ما ربطت متجرك بسيرش كونسول للحين، ابدأ من دليل كيف تخلي متجرك يظهر في قوقل لأنه يشرح الربط ورفع خريطة الموقع.
حقول السيو في كل منتج
افتح صفحة تعديل المنتج وانزل لقسم تحسين محركات البحث. فيه ثلاث حقول:
- عنوان الصفحة: اسم المنتج كما يكتبه العميل مع صفة مهمة (الحجم، النوع، الاستخدام). لا تكتب اسم متجرك فيه لأن سلة تضيفه تلقائي في الآخر.
- وصف الصفحة: هذا اللي يطلع تحت العنوان في نتائج البحث. اكتب فيه الفائدة وسبب يخلي الشخص يضغط.
- رابط الصفحة: ثبّت رابط واضح لمنتجاتك المهمة. إذا تركته فاضي، سلة تولّد رابط لحالها، وشفنا متاجر تغيرت روابطها المولدة بدون ما يلمسها أحد.
عندك منتجات كثيرة؟ ما يلزم تفتحها وحدة وحدة. من المنتجات ثم المزيد ثم الاستيراد والتصدير فيه تبويب خاص بتصدير واستيراد بيانات السيو للمنتجات: تصدّر الملف، تعبّي العناوين والأوصاف في الإكسل، وترفعه مرة وحدة.
والوصف الطويل داخل صفحة المنتج له وزنه بعد. طريقة كتابته شرحناها في كيف تكتب وصف منتج يقنع العميل يشتري.
الأقسام: صفحات تقدر تطلع في قوقل
كل قسم في سلة له عنوان سيو ورابط مخصص ووصف سيو. حد الوصف هنا 100 حرف، وإذا زدت عليه يرفض الحفظ. سمّ القسم بالكلمة اللي يبحث عنها الناس («عبايات سوداء رسمية» أوضح من «مجموعة الشتاء»). وتذكر إن تغيير اسم القسم يغير رابطه، وسلة تحوّل الرابط القديم للجديد.
ترتيب الأقسام نفسه يأثر على فهم قوقل لمتجرك، وفصّلنا فيه في كيف ترتّب أقسام متجرك في سلة.
الصور والنص البديل
النص البديل وصف قصير للصورة يقراه قوقل. في سلة يتكتب لكل صورة لحالها من صفحة المنتج، وما فيه طريقة جماعية له. ابدأ بالصورة الرئيسية لأهم منتجاتك. ولاحظ إن الحقل يرفض بعض الرموز مثل الشرطة و@ و|، فاكتب كلام عادي.
وارفع الصور بحجم معقول: الصورة الثقيلة تبطّئ الصفحة على الجوال، والجوال هو اللي يتسوق منه أغلب عملائك.
المدونة: انتبه لهالنقطة قبل ما تنشر
عنوان ووصف السيو للمقال يتحددون وقت إنشاء المقال، ومحرر المقالات بعدها ما فيه حقول سيو تعدلها. يعني اكتبهم صح من أول مرة. واربط كل مقال بالمنتج أو القسم اللي يناسبه.
جدول سريع: وين تلقى كل إعداد
| الإعداد | مكانه في لوحة سلة | ملاحظة |
|---|---|---|
| عنوان ووصف المتجر | التسويق ثم تحسين محركات البحث (SEO) | الوصف 160 حرف بدون فواصل ونقاط |
| سيو المنتج | صفحة تعديل المنتج | أو جماعي من الاستيراد والتصدير |
| سيو القسم | صفحة تعديل القسم | الوصف 100 حرف |
| النص البديل للصور | صور المنتج، صورة صورة | بدون رموز خاصة |
| خريطة الموقع وllms.txt | التسويق ثم تحسين محركات البحث (SEO) | سلة تولّد الخريطة تلقائي |
كيف تعرف إن الشغل جاب نتيجة؟
بعد أسبوعين أو ثلاثة افتح تقرير الأداء في سيرش كونسول، وشوف هل زادت مرات الظهور، وهل بدأت تطلع لكلمات جديدة. وإذا عندك منتجات ما ظهرت أبدًا، استخدم الفحوصات السبعة لمشكلة أرشفة المنتجات.
وإذا تبي أحد يمشي على هالقائمة كاملة عنك ويسلمك المتجر جاهز، عندنا تحسين سيو متجر سلة الأساسي، ولو تبي متابعة شهرية فيه باقة السيو الشهرية.
مثال: كيف يتغير منتج واحد بعد القائمة
خذ متجر عطور فيه منتج اسمه «عطر رقم 7». هذا الاسم ما يكتبه أحد في قوقل. بعد ما نطبق القائمة:
| الحقل | كان | أصبح |
|---|---|---|
| اسم المنتج | عطر رقم 7 | عطر عود رجالي ثابت 100 مل |
| عنوان السيو | فاضي | عطر عود رجالي ثابت 100 مل للمناسبات |
| وصف السيو | فاضي | عطر عود رجالي بثبات طويل يناسب المناسبات والدوام، حجم 100 مل مع شحن داخل السعودية |
| رابط المنتج | رابط مولد تلقائي | oud-perfume-men-100ml |
| النص البديل للصورة | فاضي | زجاجة عطر عود رجالي 100 مل |
لاحظ إن الوصف يقول معلومة صحيحة عن المنتج. لا تكتب «أفضل عطر في السعودية» إذا ما عندك ما يثبتها، لأن العميل يقارن والذكاء الاصطناعي بعد يقارن.
خطة أسبوع واحد تمشي فيها على القائمة
- اليوم الأول: عنوان ووصف المتجر، وإرسال خريطة الموقع في سيرش كونسول.
- اليوم الثاني: أسماء الأقسام وعناوينها وأوصافها.
- اليوم الثالث والرابع: أهم 10 منتجات: الاسم، عنوان ووصف السيو، الرابط.
- اليوم الخامس: النص البديل لصور هالمنتجات.
- اليوم السادس: باقي المنتجات من ملف تصدير واستيراد بيانات السيو.
- اليوم السابع: أول مقال في المدونة يجاوب أكثر سؤال يوصلك من العملاء.
بعدها خل لك موعد ثابت كل شهر: أي منتج جديد ينضاف، تكتب حقوله من أول يوم بدل ما تتراكم عليك.
أسئلة شائعة
هل سلة تسوي السيو تلقائي؟
سلة تجهز خريطة الموقع والروابط وقوالب العناوين، لكن الكلمات اللي في العناوين والأوصاف عليك، لأنها تعتمد على منتجاتك وعملائك.
ليش وصف المتجر ما ينحفظ؟
غالبًا لأنك كاتب فاصلة عربية أو نقطة أو شرطة أو سطر جديد، أو تعديت 160 حرف. شيلها وجرب الحفظ مرة ثانية.
هل أكتب اسم متجري في عنوان كل منتج؟
لا. سلة تضيف اسم المتجر في آخر العنوان تلقائي، وتكراره ياخذ مساحة من الكلمات المهمة.
كم منتج أبدأ فيه؟
ابدأ بأكثر 10 منتجات تبيع أو تبي تبيعها، وبعدها كمّل الباقي بملف الاستيراد.
ولفهم أساس طريقة قوقل في قراءة الصفحات، راجع دليل تحسين محركات البحث للمبتدئين من قوقل.
